આવ્યો’તો જરા માટે ને રોકાઈ ગયો છું;
દુનિયા, તારા મેળામાં હું ખોવાઈ ગયો છું.
દુનિયા, તારા મેળામાં હું ખોવાઈ ગયો છું.
ફૂલોને હું અડકયો ને ઉઝરડાઈ ગયો છું;
કાંટાઓના સંગાથથી ટેવાઈ ગયો છું.
કાંટાઓના સંગાથથી ટેવાઈ ગયો છું.
ભીની ભીની નજરે તમે મારા ભણી જોયું;
વરસાદ નથી તોય હું ભીંજાઈ ગયો છું.
વરસાદ નથી તોય હું ભીંજાઈ ગયો છું.
સીધા ને સરળ રસ્તે જવા નીકળ્યો હતો,
આવી જયાં ગલી તારી ત્યાં ફંટાઈ ગયો છું.
આવી જયાં ગલી તારી ત્યાં ફંટાઈ ગયો છું.
શોધો ન મને કોઈ નદી-તટની સમીપે;
મૃગજળના અરીસામાં હું પકડાઈ ગયો છું.
મૃગજળના અરીસામાં હું પકડાઈ ગયો છું.
અંધારખૂણા, થાંભલા, દીવાલને છપ્પો!
શૈશવને કહો, કયાંય હું સંતાઈ ગયો છું!
શૈશવને કહો, કયાંય હું સંતાઈ ગયો છું!
અપરાધ હો તો એ જ કે ખુશ્બૂ મેં ઉછાળી;
ચોરે ને ચૌટે, ગલીઓમાં ચર્ચાઈ ગયો છું!
ચોરે ને ચૌટે, ગલીઓમાં ચર્ચાઈ ગયો છું!
- ભગવતીકુમાર શર્મા
